BJP hruaituin Ethics Committee din a duh

Central-a rorellai, BJP hruaitu zinga eng emaw zat chu puh hmingchhiat an ni mek a, eptu lam pawhin bang turin an nawr mek a ni.

Himachal Pradesh-a BJP hruaitu hlun, Chief Minister hlui leh, Atal Bihari Vajpayee kaihhruai sorkar hnuaia union minister pawh lo ni tawh, Shanta Kumar chuan BJP President hnenah lehkha thawnin, tun hnaia an hruaitute puhna hrang hrang chuan an party hmel a tibal nasa hle a, hei vang hian party chhungah eirukna leh thil dik lo awm ṭhinte haichhuah a nih theihna atan 'ethics committee' din a duh thu a hrilh.

Kumar chuan BJP sorkarna, Madhya Pradesh-a sum tam tak inrawlhna, Vyapam scam chuan a tizak hle tih sawiin, "He thil thleng hian zakin min kuntir a ni," a ti.

Dan bawhchhetu, ILP hotu hlui Lalit Modi a ṭanpui avanga eptute'n bang tura an nawr, Rajasthan Chief Minister Vasundhara Raje leh dik lo taka thiltihnaa inhnamhnawiha puh, Maharashtra Chief Minister Pankaja Munde-te thiltih danah an hminghmerha sawilang loin chhui chian ṭul a tih thu a sawi bawk.