Memon-a ngenna SC-in a hnawl

Kum 1993-a Mumbai khawpuia bomb tipuaktu, July 30-a khaihlum tur, Yakub Abdul Razak Memon-a'n a hremna ngaih­­tuah nawn tura a ngen­­na chu Supreme Court chuan nimin khan a hnawl.

July 15 khan Maha­rash­tra sorkar chuan Me­mon hi July 30-a khai­hlum turin a chungthu a lo relsak tawh a, a tanna Nag­pur Central Jail-ah a thih hma chu khai tura tih a ni. Memon hian Supreme Court-ah ngenna thlenin, khaihlum tura court-in a hremna chu ngaihtuah ṭha turin a ngen a, hei hi dan anga dilna a siam theih hnuhnung ber a ni tawh. Mahse Supreme Court chuan a ngenna hi a hnawlsak ta a ni.

Maharashtra Chief Mi­nister Devendra Fadnavis pawhin Memon-a tihhlum ni leh a hun turte pawh hi a pawmpui vek tawh a, a chhungte pawh hriattir an ni tawh bawk.

Kum 1993, March 12 khan Mumbai khawpuiah vawi 13 zet bomb tihpuah a ni a, bomb puakah hian mi 257 an thih bakah midang 700 chuangin hliam an tuar a ni. Pawi­khawihna thlengah hian Memon bakah a unaupa, Ibrahim Memon, Tiger Memon tia hriat chu inhnam­hnawiha puh a ni bawk. Tiger Memon hian kum 1993 khan India ram a chhuahsan a, tun thlengin a awmna chin hriat a la ni lo.

Memon-a khaihlum tur hian constable pathum chu training pek an ni ang.

July 30-ah Memon hi khaihlum a nih chuan Nagpur Central Jail-a mi an khaihlum 24-na leh, Maharashtra state-a mi khaihlum 58-na tur a ni.

Yakub Abdul Razak Memon hi kum 1962, July 30-a piang a ni a, Chartered Accountant hna a thawk ṭhin. Kum 1994 khan Mumbai khawpui bomb tihpuah chu a ruahmantu ber nia puhin Nepal ramah man a ni. Kum 2007 khan Mumbai-a Special Ter­rorist and Disruptive Acti­vities (Prevention) Act (TADA) court chuan thiam loh chantirin thi turin a chungthu a relsak a ni. Jail-a a tan chhung hian Indira Gandhi National Open University (IGNOU) aṭang­­in English Literature leh Political Science-ah Master Degree a zo. Khai­hlum ni tura ruat hi a pian­cham, kum 58 a tlinna ni tur a ni.