Vyapam scam: Sonia leh Rahul-a'n duh lohna lantir dawn

Congress President Sonia Gandhi, vice president Rahul Gandhi leh party hruaitu dangte chuan vawiin hian Madhya Pradesh-a professional course zir tur leh sorkar hna lak dan dik lo taka kalpui a nih dan duh lohna an lantir dawn.

Congress member-te chuan Vyapam scam hailan a nih hnua state sorkar hmalakna ṭhat tawk loh avangin an lungawi lohna an lantir dawn a ni. Madhya Pradesh Chief Minister Shivraj Singh Chouhan chu bang turin an phut bawk.

Vyapam scam chungchang chhui a nih hnuah hian he thil inhnamhnawiha puh leh thuhretu mi 40 chuang zet chu mak takin an thi tawh a ni. Thil awmdan dik taka chhui a nih theihna turin CM Chouhan chu a ban a ngai tiin Congress chuan an sawi.

Congress hruaitu Anand Sharma chua, "Thil dik lo tia kan hruaitute puh an nih chuan bang turin kan ngen ṭhin. Pawan Kumar Bansal pawh Railway minister a nihna aṭangin a bang a, Maharashtra Chief Minister Ashok Chavan pawh Adarsh scam-ah inhnamhnawiha puh a nih avangin CM a nihna aṭangin a bang bawk. Hetiang bawk hian BJP hian an tih ve kan beisei a, mahse thil dik lo titu an party hruaitute hi tun thlengin an la bang lo. Hei hi BJP kaihruai NDA leh Congress kaihhruai UPA danglamna lian tak a ni," a ti.

Supreme Court chuan Vyapam scam chhui mektu, Central Bureau of Investigation (CBI) in a hmaa hemi chungchang lo chhui tawh, Madhya Pradesh-a Special Task Force (STF) leh Special Investigation Team (SIT) te charge sheet siam phalsak tura a ngenna chu a pawm.

CBI hian July 16 khan Supreme Court hnenah hian an kut aṭanga thubuai 185 lak fel hun chu a rei dawn avangin, state investigating agency-te hi charge sheet an siam phalsak mai turin a lo ngen a ni. Charge sheet hi thehluh a ni mai loh chuan an puhate hian chhuanlam siamin, bail an lo dil thei dawn a ni, a ti.