Aarogya Setu app a him tawk

Covid-19 contact tracing tihna atana siam, Aarogya Setu app hmangte tan security a him tawk em tih inhnialna a awm chhoh lai karah, sorkar laipui chuan he app hi a him tawk a ni tih nimin khan a tarlang.

Activist leh organisation ṭhenkhat chuan tun hnai, a bikin Nilaini aṭang khan he app hi a him tawk lo niin an sawi nasa hle a, app hmangtute personal data chu a humhim tawk loh thu leh he app kaltlang hian sorkar chuan app hmangtute hi a en thlithlai thei niin an sawi bawk. Nilaini zan phei kha chuan he app siamtute hi hriat an nih loh thute hial twitter lama post darh a ni. 

Mahse nimin khan sorkar chuan hei hi chhangin,  Aarogya Setu app hi National Informatics Centre (NIC), industry leh academia aṭanga volunteer ṭangkawpten an siam a nih thu Ministry of Electronics and IT (Meity) thuchhuah chuan a tarlang. Meity Aarogya Setu app chu a himin, langtlang taka siam a nih thu sawiin, hlauhthawn tur a awm lo, a ti. 

Meity thuchhuah chuan, kumin April 2 khan press release leh social media kaltlangin, sorkar laipui chuan Covid-19 dona kawnga mipuite nena an thawhho theihna atan, public private partnership mode hmangin Aarogya Setu app hi a lo tlangzarh tawh a ni, tiin a tarlang. India mithiamte thluak hmangin, 'Made in India' contact tracing app atan ni 21 chhungin he app hi siam a nih thu a sawi bawk. He app siamna kawnga thawktute pawh Open/ Public Domain hmangin tlangzarh vek a ni, a ti bawk.