Odisha-in primary school 8,000 vel khar dawn

Odisha sorkar chuan an state chhunga odd primary leh upper primary school 8,000 vel chu academic year kal mekah hian khar turin thutlukna an siam a, hei hi school kalpui zel tura zirlai an tlem lutuk vang a ni.

State School and Mass Education Department chuan thuchhuah an siamah primary school khar turte hi zirlai 20 awm tlin lohna a ni a, heng school an khar vang hian learning environment, infrastructure facility, academic environment leh co-curricular facility ṭha zawk zirlaite'n an neih theih phah dawn niin an tarlang.

He hmalakna hi Niti Aayog Sustai­nable Action for Transforming Human Capital in Education (SATH-E) project hnuaia an kalpui niin an hmalakna hmingah hian 'Consolidation and rationalisation' an vuah a, school an khar taka kalte an school hnai ber zel an pan khawmtir mai dawn a ni.

Odisha School Education Prog­ramme Authority Joint Director, Surekha Tarei chuan district 27-ah odd school khar tur a awm tih leh a dang 2,000 chu district pathuma mi a ni tih a sawi. School kalna an sawntirte hian nitin Rs 20 an dawng dawn a, hetia school an sawikhawm hmang hian class tinah zirtirtu an tam zawk dawn thu a sawi bawk.