PM Modi-an global south hmasawnna tur MAHASAGAR ruahmanna puang

Mauritius tlawha zin mek prime minister Narendra Modi chuan, nimin khan hmathlir leh ruahmanna hrang hrang, global south ramte tana venhimna leh hmasawnna thlenthei tur te a puang. Hmalakna tur bakah, ram pahnih thawh dunna tur hrang hrang MoU chu Mauritian prime minister Navinchandra Ramgoolam nen an ziak bawk.

PM Modi chuan media thuchhuah siamah, global south tana hmathlirna thar "Mutual and Holistic Advancement for Security and Growth Across Regions(MAHASAGAR)" chu tihhlawhtlin tum anih thu a puang a, hemi kaltlang hian ram pahnih tan venhimna lama hmasawnna nasa tak a thlen theih beisei a nih thu chu a zin hun tawpniah hian a sawi bawk.

Hmathlir thar hian ram pahnihte hmasawnna tura insumdawn tawn nate, thiamna leh theihna tipunga ṭhanlenna ngelnghet neih bakah, hmalam huna ram pahnihte tana venhimna ṭha neih ve ve chu India hmathlir thar hian a thil tum ber a nih thu PM Modi chuan a sawi.

Modi chuan Mauritius chu India tana ṭhianṭha a nih thu sawiin, India hmathlir 'Security and Growth for All in the Region (SAGAR )' chu kum 10 liam taa Mauritius-a duan chhuah anih thu a sawi lang bawk. Hei mai bakah Mauritius chu Global South ramte nen an inkar ti ṭhatu a nih bawk thu a tarlang.