Africa ram palite puihna tur thawn

Sorkar laipui chuan Covid-19 leng vang leh, leilung chhiat­na hrang hrang avanga harsatna tawk mek, Africa ram pali - Sudan, South Sudan, Dji­bouti leh Eirtrea ramte ṭanpui­na turin ei tur MT 270 a thawn. 

Ministry of External Affairs chuan thuchhuah siamin, India leh Africa ramte chu kum tam tak chhung ṭhianṭha leh inzawmna nghet tak nei a nih thu a sawi. Heng ramten harsatna an tawh mek chu India chuan a tawrhpui a, hmasawnna tura hma an lakna hrang hrangah a thawhpui zel a ni, a ti. 

Africa ram ṭanpuina tur hi Navy lawng Airvat hmangin phurh chhuah ani a, Djibouti, Maswa, Port Sudan leh Mom­basa-ahte a ding ang. A thil phurh hi wheat MT 155, buhfai MT 65 leh chini MT 50 a ni. 

Khawvel ram hrang hranga hripui leng tuar mek zinga ram 150 hnenah India chuan anti-Covid medicine HCQ tam tham tak a lo thawnchhuak tawh bawk. Indian Ocean-a ram panga, Maldives, Mauritius, Syechelles, Madagascar leh Comoros-te pawh an rama  hri leng an dona kawnga puihna turin damdawi leh ei tur eng emaw zat a lo thawn tawh bawk.