Mayawati-in an party MLA hel pasarih hrem

30th October, 2020

Bahujan Samaj Party (BSP) hotu leh Uttar Pradesh chief minister hlui, Mayawati chuan nimin khan an party MLA hel pasarihte a suspend.

Heng MLA hremte hi Chaudhary Aslam Ali, Hakim Lal Bind, Mohammad Mujtaba Siddiqui, Aslam Raini, Sushma Patel, Hargovind Bhargava leh Bandana Singh an ni a, an hel chhan hi an party aṭanga Rajya Sabha MP official candidate tur Ramji Gautam an duh loh vang a ni. An zinga pali chuan RS MP candidate tana Ramji Gautam nomination thehluha an signature lang pawh chu siamchawp niin an sawi. Hetih lai hian Returning officer (RO) chuan Gautam nomination thehluh hi a pawm fel tawh a, UP-a Rajya Sabha MP seat ruak 10 chu November ni 9-ah thlan a ni ang.

Nilaini khan heng BSP MLA helte hian Samajwadi Party hotu Akhilesh Yadav an hmu a, hei vang hian an party aṭanga chhuak tur anga sawi thawm pawh a awm zui nghal bawk.

Mayawati kaihhruai BSP party chuan Thawhṭanni khan Rajya Sabha inthlan tura an party candidate chu BJP ni lo party dangten an thlawp ngei an beisei thu an sawi.