India-ah cryptocurrency thuneitu pakhat man a ni

India thuneitute chuan US-in an ngenna te bawhzuiin nimin khan cryptocurrency exchange administrator, Garantex hnuaia pawisa tihchingpen vanga thubuai neilai Aleksej Besciokov chu Kerala-ah man a ni. US, Germany leh Finland ram te chuan Russia-a inkhuar cryptocurrency exchange-na atana online infrastructure te chu an lo tukdawl tawh bawk nia an sawi bakah, kar hmasa khan US Justice Department chuan hemi kaihhnawiha thuneitu pahnih an lo man tawh bawk a ni.

Central Bureau of Investigation-in Garantex kaltlanga Cryptocurrency hmalakna hnuaia thawk an man Aleksej Besciokov hi Russia-a cheng niin Lithunian ram mi leh sa a ni, pawisa tih chingpen kaihhnawihah leh dan loa pawisa inthawn chhawnna hmanga sumdawnnaah thubuai hrang hrang nei lai leh rinhleh kai a nih thu US justice department chuan a sawi.

Besciokov hi US thuneihna hnuaia misual zawn mek niin, US lamin CBI hnenah ngenna an thlen hnuah India Foreign Ministry pawmpuinain man phalna warrant tihchhuah a ni. Besciokov hian India-ah tlanchhiat a tum tih hriat a ni a, engvanga India hi pan nge anih hriat a nilo thung. Cryptocurrency aṭanga pawisa inthlengnaah hian USD vbc 96 lai chu April 2019 aṭang khan khawih chet a lo ni tawh niin US justice department chuan an tarlang.

Besciokov hi Delhi court-ah hruai tura tih a ni a, mahse engtik hunah nge US-ah thawn a nih dawn erawh hriat a la ni lo a ni. Kar liam ta khan US chuan Besciokov bakah hian cryptocurrency exchange co-founder Aleksandr Mira Serda pawh pawisa tihchingpenna thleng kaihhnawihah hian an lo man tawh a ni.