PM-in Labour Conference a hawng

Prime Minister Naren­dra Modi chuan nimin khan New Delhi-ah Indian Labour Conference vawi 46-na a hawng.

PM Modi chuan labour law thlak danglam a nih dawn chuan Labour union-te rawnin, lungrual tlanna anga siam ṭhin a ni ang, tiin tuna labour law hman lai mek chu hriatthiam a har a, hei vang hian mi rethei ber phawin an dikna chanvote an hriatthiam theih turin dan hi a awlsam thei ang bera siam danglam a tum thu a sawi. Modi chuan retheihna chu a mit ngeia hmuin amah ngei pawhin tawnhriat a neih thu sawiin, camera nena kala va hmuh ngei a tan a ngai lo tih a sawi.

Sorkar laipui chuan Fi­nance Minister Arun Jait­ley-a kaihhruaina hnuai­ah labour union-te har­satna hrang hrangte sawipui turin high-level inter mi­nis­terial committee a din a, Pathianni khan meeting hmasa ber neih a ni.

Modi chuan NDA sorkarin hnathawktute dinhmun chawikanna turin kawng hrang hrangin hma a la tih a sawi a, mini­­mum pension pawh thla Rs 1,000 ah tisangin, social security leh pension scheme bakah online PF account-te siamsak an ni, a ti.

PM chuan sorkar laipuiin social security scheme a siam thar chu mi hausa tan ni loin, mi rethei tan zawk a ni tiin, trade union hnenah pawh heng scheme-te hi an theihtawpa vawrh darh turin a ngen nghal bawk.