Congress-in Sushma, Raje leh Chouhan bang turin an phut

Congress party chuan Parliament Monsoon Session tluang taka neih a nih theihna atan BJP hruaitu puhchhiat tawk mekte, Sushma Swaraj, Vasundhara Raje leh Shivraj Singh Chouhan-te chu bang turin an phut.

Rajya Sabha-a eptu hruaitu, Ghulam Nabi Azad chuan BJP hian an hruaitu hminghliauna nei mekte hi an ban ngam anih chuan, Parliament session-a bill pawimawh tak tak pharh a tumna kawng a awlsam phah sawt dawn a, mipuite laka an party hmingchhiatna siamṭha turin a pui thei dawn a ni, a ti.

Azad chuan parliament rorel tluang tak a neih theih a nihna tur chu eptute kutah ni loin, rorellai party kutah a awm a ni, a ti. Congress chuan mipuite tana ṭangkai tur dan siamte chu a pawimawh a, pass ngei pawh an duh tiin a sawi. "Hei vang hian BJP-in dik lo taka thiltihnaa inhnamhnawih party hruaitute hi ban ngam rawh se," tiin a sawi. Parliament rorel tluang taka kalpui a nih leh nih leh loh tur chu Prime Minister kuta awm a ni tiin, session ṭan hunah PM hian an party hruaitu hmingchhiate ban an nih thu a puan chuan rorel a awlsam phah hle dawn a ni, tiin a sawi

Hetihlai hian session huna eptu party-te'n an beihna lo chhang let turin BJP chu a inpuahchah nasa hle a, party hruaitute hi an puhna lakah chhan tlat an tum. Pathianni khan Madhya Pradesh Chief Minister Shivraj Singh Chouhan leh Rajasthan Chief Minister Vasundhara Raje-te chuan an party hruaitu lu te an hmu a, thil awmdante an hrilhfiah nghal a ni. BJP chuan eptute nawrna laka tlawm mai an tum lo tih an sawi a, party hruaitu zingah tumah ban an ni lo ang, an ti.

External Affairs Minister Sushma Swaraj leh Rajasthan CM Raje-i te hi dan bawhchhiaa puh tlanchhe mek, Indian Premier League (ILP) hotu hlui Lalit Modi ṭanpuia puh an ni. Madhya Pradesh CM Chouhan hi an state chhunga dik lo taka thiltihna thleng, Vyapam scam kaihhnawiha mi 49 thihna thleng chungchangah bang tura nawr a ni bawk. Eptute hian HRD Minister Smriti Irani chu educational certificate dik loa siama puhin beih tel an tum a, hei bakah hian buhfai hralh dan dik lo chungchangah Chhattisgarh Chief Minister Raman Singh pawh an cha chhuah rin a ni bawk.

Session boruak ṭha tak a awm a, rorelna tluang taka neih a nih theih dan ngaihtuahin nimin khan Lok Sabha speaker Sumitra Mahajan-i chuan all party meeting a ko. Hemi hma hian Parliamentary Affairs Minister Venkaiah Naidu pawhin all party meet hi a lo ko tawh bawk. Naidu chuan NDA sorkar chuan engmah thup leh hlauh tur a nei lo a, thil hrang hrang sawiho tur pawh eptute nena sawiho turin a inhawng reng a ni, a ti.

Parliament Monsoon Session hi July 19 aṭanga August 3 thleng neih a ni dawn a, session chhunga ngaihtuah turin sorkar chuan thupui 35 a tichiang tawh a, heng zingah hian Rajya Sabha-a bill tihkhawtlai pakua leh Lok Sabha-a tihkhawtlai bill pali a tel bakah, bill thar 11 pharh tel a tum a ni.