India-in rel hijack chungchanga Pakistan-in a puhna diklo ti

Pakistan chuan, tunkar tir lama Jafar Express rel hijack-na thlengah, India inhnamhnawih anga a puhna chu India-in thudik tawk lo leh behchhan mumal neiloa inpuhna a ni, tiin a chhanglet. Pakistan foreign office thupuangtu Shafqat Ali Khan chuan, rel beihna thlengah hian ramri pelin Afghanistan-a awm pawikhawihnaa bultumtu leh India chu thawkdun an nih thu an thuchhuahah hian an tarlang.

He puhna thlengah hian Ministry of External Affairs thupuangtu, Randhir Jaiswal chuan, "Pakistan-in min puhna hi thudik tawklo leh belhchian dawllo a ni. Ram zawng zawngin khawvel puma helpawl tamna hmunpui chu khawilai nge tih an hre vek. Pakistan chuan an ram chhunga inrelbawlna fello leh diklo thlengah midang puh tur zawng lovin an mahni inenfiah rawhse" tiin Pakistan puhna hi a chhanglet a ni.

Pakistan-a Jafar Express rel hijack-na thlengah hian rela chuang mi 21 in nunna an chan bakah chhanchhuah hna thawktu sipai paliin nunna an chan bawk. Rel hijack-tuah hian Baloch Liberation Army(BLA)-te chuan an tih anih thu sawi chiang tawh a, heti chung hian India in hnamhnawih angin Pakistan lam hian puh tur dang an zawng veleh a ni. Chhanchhuah hna thawhnaah hian helpawl BLA mi leh sa 33 te chu thah chimih vek an ni.

Rel hijack-na thleng vanga Pakistan foreign office thupuangtu Ali Khan chuan, thuthar lakhawmtute zawhna chhangin,"India chuan a ṭhenawm ramte leh khawvel hmun hrang hrangah inkungkaihna ti chhe zawnga hmalakna an kalpui ṭhin a ni" a ti. Hengte hi India puhna tur leh demna an zawn vang pakhat a nih thu India lam chuan a sawi ve thung.

Jafar Express rel hi hijack a nih ni hian Balochistan khawpui Quetta pana kal niin, helpawl hian Peshawar hmunah relkawng bomb hmanga beiin rel engine leh khualzin te chuanna coaches pakua te chu thunun a awmlsamna turin leiverh chhungah an din tir niin tarlan a ni.