PM Modi-a'n NDA meeting a ko

July 21 aṭanga ṭan tur, Par­liament Monsoon Session neih turah eptute chuan Lalit Modi buaina te, Vyapam scam leh thil dangah sorkar laipui an beih ngei rin a ni a, hemi atana lo inbuatsaih lawk dan tur ngaihtuahin Prime Minister Narendra Modi chuan nimin khan NDA meeting a ko.

Eptu pawl lian, Congress leh Left party-te chuan tun hnaia thil dik loa tihnaa BJP hruaitute inhnamhnawihna hrang hrangah sorkar laipui hi an beih nat hle rin a ni a, boruak pawh a sang lawk hle a ni.

PM Modi pawhin Parliament session neih tur hi boruak a sang dawn hle niin a sawi a, hei vang hian meeting hi a ko ta nia ngaih a ni. Kum 2014 May thlaa thuneihna a chan hnuah tun ṭum hi NDA meeting a kohna hmasa ber a ni.

NDA hnuaia BJP thawhpui party lian ber, Shiv Sena chuan NDA meeting hi a hmain a lo phut tawh a, PM-in meeting a ko ta chu lawmawm an tih thu party hruaitu Sanjay Raut chuan a sawi. Meeting hian eptute chona chhan letna tura inbuatsaihna kawngah a pui thei dawn a ni, a ti.

BJP kaihhruai NDA hian Lok Sabha-ah majority nei mah se, Rajya Sabha-ah majority a neih phak loh avangin bill pawimawh GST leh Land Bill te pawh a lo dangchat tawh a ni. Rajya Sabha-ah hian Congress chu party mala seat ngah ber a la ni.

Parliamentary Affairs Minister M Venkaiah Naidu leh Speaker Sumitra Mahajan-te chuan parliament rorel hi boruak ṭha tak hnuaia neih a nih theihna turin vawiin hian all-party meeting an ko bawk.

Congress vice president Rahul Gandhi chuan session hunah hian an party chuan Lalit Modi chungchang te, Vyapam scam leh rorellai sorkar thiltih dik tawk lo hrang hrangte an auchhuahpui tur thu a lo sawi tawh a, tunlaia rampuma buaipui mek thil dik lo haichhuahahte PM Modi chu a ngawi tlat a, hei hian eirukna dodal a tum tak tak lohzia a tilang chiang hle, a ti.