Water project thawhna atan US firm-in thamna a pe
US-a New Jersey-a inkhuar, construction management firm chu Goa leh Guwahati-a water project lian pahnih a thawh theihna atan official-te thamna a pek vangin US justice department chuan sum a chawitir.
Louis Berger International Inc, hian US Foreign Corrupt Practices Law palzuta thamna pea puhna chu a pawm thu a sawi a, kum 1998-2010 inkar khan India, Indonesia, Kuwait leh Veitnam-ah an hnathawkten thamna sum dollar maktaduai 3.9 an pe chhuak tih a sawi bawk. Goa project thawhna atan hian Indian official-te hnenah thamna dollar 976,630 a pe a, thamna dawngtu zingah hian minister pawh a tel. Mahse minister hming erawh chu puanzar a ni lo.
US Justice Department chuan kar kalta Zirtawpni khan dan kalha thamna a pek ṭhin avang hian Louis Berger company chu dollar maktaduai 17.1 chawi turin a ti a ni. Company executive hlui pahnih, Philippines mi Richard Hirsch (61) leh UAE mi James McClung(59) te chuan thamna hi an pek ṭhin thu an sawi.
Hirsch leh McClung-te chungthu hi November 5 hian ngaihtuah a ni ang. McClung hi India leh Vietnam rama company hmalaknaa mawhphurtu atana dah ṭhin a ni. Kum 1998 aṭang khan Louis Berger hian India ramah inbunin, Gurgaon, Mumbai, Chennai leh Hyderabad-ahte office a nei a ni.