Vyapam scam: Kum 45 chhungin exam kalpui dan endik a ni lo
Kum 1970-a din, Madhya Pradesh Professional Examination Board, Vyapam-in exam a kalpui dan chu state sorkar chuan exam bautsaih tirh a nih aṭangin a la endik lo.
RTI hmanga zawhna chhannaah hemi chungchang hi tarlan a ni. Zawhna zawttu hian board-in exam a kalpui dan te, question paper siamtu te, khawi hmunah nge an print, an kalkualna atan sum hmanral leh OMR (Optical Mark Recognition) sheet endik tura mithiam an rawih te, question paper siamtu, expert leh printing press-te hnena sum an pek dante zawh a ni. Zawhna zawttu hi Ajay Dubey a ni.
Ajay Dubey chuan, "Boards hian kumtinin cheng vaibelchhe tel sengin exam hi a buatsaih ṭhin. Mahse board-in pawn lama a hnathawjh dante enfiah ṭhin a nih laiin, confidential account-te erawh chu din a nih tirh aṭangin enfiah a la ni lo. Hei vang hian sorkar hnenah pawh confidential account-te hi endik turin kan ngen nghal a ni," a ti.
Directorate of Local Fund Audit chhanna aṭangin, kum 2008-a exam buatsaihah khan strong room-a OMR sheet enkawl danah thil fel lo tak a awm tih tarlan a ni bawk. Dubey chuan, "Strong room enkawl hna hi dik lo taka titute hian lo hijack-in anmahni hian an enkawl zui a ni. OMR sheet supply status, bill number leh challan number-te data record pawh a awm lo a ni," tiin a sawi.