SC judge atan Justice Joymalya Bagchi la lut dawn

Calcutta High Court judge ni lai, Justice Joymalya Bagchi chu vawiin Thawṭanni hian Supreme Court judge tur atan lakluh a ni dawn. March 6 khan CJI Khanna kaihhruai member panga awmna collegium chuan Supreme Court judge atan hian rawtna an thlen a ni.

Lawmluhna inkhawmah hian CJI Sanjiv Khanna chuan a telpui dawn bawk, lawmluhna inkhawm hi court sang berah hian SC judge dangte awm laiin neih a ni ang. Justice Bagchi hian rinawmna thu a tiam hnuah, SC judge awm thei zat 34 aṭangin 33 an awm tling dawn chiah bawk.

Justice Bagchi hi October 3, 1966 a piang niin, Calcutta High Court-ah June 27, 2011 khan judge atan ruat a ni a, January 4, 2021 khan Andra Pradesh High Court-ah sawn leh niin hemi kum vek November thla hian Calcutta High Court-ah sawn leh niin SC judge atana ruat anih thleng hian a thawk chhunzawm a ni. High Court judge ah hian kum 13 chuang thawk tawhin all-India seniority-ah pawh 11-na a ni pha bawk a ni.