Delhi-a in chimah mi panga an thi

Delhi khawthlang lam, Vishnu Garden area-ah Inrinni zan khan in chhawng li-a sang a chim a, mi panga an thi a, mi dang pali-in hliam an tuar. In chimin a delh mi pakua-te chu chhanchhuah an ni.

In chim-in a delhte chhanchhuah hna thawk tur hian National Disaster Relief Force (NDRF) leh kangṭhelhtu team pariat, local police leh official-te an kal nghal a ni. In neitu lakah hian FIR ziahluh nghal a ni bawk.

NDRF Director General chuan, "In sak hi a nghet ṭha tawk lo a ni," a ti a, in neitu chu himna lam ngaihthah leh midang thihna thlena puh a ni bawk. A ṭhenawma chengte pawhin in neitu hnenah hian a in hi a nghing tih an lo hriattir tawh niin an sawi.

Delhi-a rorellai, Aam Aadmi Party (AAP) MLA Jarnail Singh chuan vanduaina thlen chhanah Municipal Corporation a puh. Delhi sorkar chu vanduaina thlen dan hi chhui chiang turin a phut nghal bawk.

AAP member-te chuan nimin khan Delhi Police-te laka lungawi lohna lantirin police headquarters kawtah an pungkhawm. Mipui pungkhawmte hnawhdarh tumin police-te chuan water cannon-in an phuh a ni.

AAP chuan Delhi Police-te chu ni thum liam taa Anand Parbat venga nula kum 19 mi thah a nih chungchangah mawhphurtuah an puh a, police-te chuan hmeichhiate himna an pe thei lo a ni, an ti. Nimina nawrh huaihawt zinga mi ṭhenkhat chu man an ni a, mahse a hnu lawkah chhuah leh nghal an ni.

Chief Minister Arvind Kejriwal chuan vawiin hian Delhi Police commission BS Bassi hmuin, khawpui chhunga dan leh thupek kenkawh dan chungchangte a sawipui ang. CM hian nula chhungte hnenah hian ralna, cheng nuai 5 pek a nih tur thu a sawi.

AAP hruaitu, CM media adviser Nagender Sharma chuan, "Delhi BJP MP pasarih-te chu Delhi Police PRO ang maiin an ṭawng a, mahse vanduaina a thlen hnuah an zinga tumahin an AC room an chhuahsan duh lo a, vanduaina tawk nula chhungte hnem tur pawhin hun an nei lo a ni," tiin a sawisel.

AAP youth wing leader, Vandana Singh pawhin Delhi khawpui chhunga pawngsual leh hmeichhe chunga mawi lo taka chetna a hluar zel tih sawiin, police hotu Bassi-a chu khawpui chhungah hmeichhiate venghim turin police-te'n eng angin nge an thawh tih sawifiah turin a phut bawk.