Parliament Monsoon session atan sorkar a inbuatsaih

18th July, 2015

Parliament Monsoon session, July 21 aṭanga ṭan tur atan sorkar a inbuatsaih mek a, session-ah hian bill thar pariat pharh hman a tum. Bill pharh a tum zingah hian Road Transport & Safety Bill, 2015 pawh a tel.

Sorkar chuan bill tihkhawtlai lai 11 pawh pharh a, session chhung hian pass hman ngei a tum. Bill tihkhawtlai zingah hian land aqcuisition bill pawh a tel. Session hi August 13 thleng neih a ni ang.

Nimin hian session huna bill pharh turte Parliament Affairs Minister Venkaiah Naidu-an a thlir kual hnuah tihfel a ni.

Hetihlai hian Congress vice president Rahul Gandhi chuan NDA sorkarin Parliament-a Land Acquisition Bill pass a tum chu danchah ngei a tum thu a sawi. Congress party chuan loneitute ram inchi khat pawh sorkarin a laksak a phal dawn lo a, loneitute chuan thla ruk chhungin Prime Minister Narendra Modi-a '56-inch chest' chu inches 5.6 ah an tihtet sak dawn tih a sawi.

Narendra Modi hian kum 2014 kumtir lam khan Uttar Pradesh-a rally huaihawta thu a sawiah, '56 -inch chest' tih ṭawngkam hi a hmang a, hei hi Samajwadi Party hotu, Mulayam Singh Yadav-a'n UP chu Gujarat anga a siam thei dawn lo tia sawi, a chhanletna ṭawngkam a ni. Modi chuan UP chu Gujarat-ah siam theih a ni lo a, chumi tur chuan inches 56-a lian awm neih a ngai ang, a ti. Mulayam Yadav chu tihelin, Modi chuan "UP hi Gujarat ang a nih chuan Gujarat mipuite chu hna zawngin an rawn kal ang, mahse thil awmdan chu a inletling zawk si a, engmah i ti thei lo a ni," a ti.

Rahul Gandhi chuan dan bawhchhetu, IPL chairman hlui Lalit Modi ṭanpuitu BJP hruaitu pahnih, Rajasthan Chief Minister Vasundhara Raje leh External Affairs Minister Sushma Swaraj-te chungchang pawh a sawichhuak bawk.

Gandhi chuan Raje-i kaihhruai Rajasthan sorkar chu London aṭangin Lalit Modi-a'n a duh angin a thunun a ni, a ti. Dan bawhchhiat vanga tlanchhia a ṭanpui avangin Rajasthan CM chuan India ram dan a bawhchhia a ni, a ti.

Congress hruaitu chuan Prime Minister Narendra Modi-a kaihhruai sorkar chu ram pawn lama sum chheprelh lakluh an lo tiam tawh chungchang hriattir nawn lehin, "London-a vaibelchhe tam tak nena awm mek, Lalit Modi-a chu la kir hmasa phawt rawh u," a ti.