Maggi khap chungchang Sorkar lab-te'n lead test-na hmanrua an nei lo

Nestle company chuan Bombay High Court hnenah Maggi noodles hralh­chhuah khapna thu­pek chu titawp turin a ngen a, sorkar laboratory-te chu lead test nei thei tura thuam an ni lo, a ti.

Maggi noodle sample-te hi test a nih hnuah danin a phal chin aia tam lead telh a nih bakah, a tihtuina atana hmehhan telh pawh phal chin bak nia sawi a ni a, hei vang hian state tam takah hralhchhuah khap a ni. Delhi, Maharashtra, Punjab, Assam, Bihar, Madhya Pradesh, Tamil Nadu, Jammu and Kash­mir, Gujarat, Goa leh Utta­ra­khand state-te chuan lead awm zat chu mihring hriselna atana pawi chin nia sawiin an khap tawh.

Central health watch­dog Food Safety and Standards Authority of India (FSSAI) pawhin Maggi noodle chi hrang hrangte chu a him lo tia sawiin a khap a, Nestle India pawh noodle chi kua a pek chhuah tawhte a lakkirtir leh vek a, siam chhunzawm rih lo turin a ti bawk.

Maggi khap a nih chung­chang hi Nestle India chuan Bombay High Court-ah khingin, West Bengal, Pune, Delhi-a laboratory-te chuan lead test neihna hmanruaa thuam an ni lo a, Varodra, Rajkot leh Uttrakhand lab-te chu lab test neih phalna pek an ni lo tiin a sawi. Hei bakah hian lab pahniha sample inang test-naah a result chhuak a inang lo a ni, a ti.

Hetihlai hian rampawn lamah chuan Nestle India siam, Maggi noodle hi an enfiahnaah a hima ngaih a ni a, zawrh chhuah phalsak a ni thung.