SC-in CBI ngenna a ngaihtuah dawn

Supreme Court chuan Madhya Pradesh-a profes­sional course zir tur leh sorkar hna lakna dik lo taka kalpuina, Vyapam scam chungchanga Central Bureau of Investigation (CBI) ngenna chu July 20-a ngaihtuah a remti.

Vyapam scam hi Supreme Court thupek angin CBI-in a chhui mek a ni. CBI hian a hmaa lo chhuitu, Special Investigation Team (SIT) chu charge sheet thehluh phalsak turin a ngen a, hei hi ngaihtuah a ni ang.

Chief Justice HL Dattu kaihhruai bench chuan agency ngenna hi remtiin, CBI chu an dilna copy chu vyapam scam kaihhnawih dangte hnenah pawh pe turin a hriattir bawk.

CBI aiawha dilna thehluttu, Additional Solicitor General (ASG) Maninder Singh chuan SIT-in Vyapam scam kaihhnawiha thubuai 185 chuang et alo siam tawh chu CBI kuta hlan tur chuan hun rei tak a ngai dawn tih a sawi. Hei vang hian state investigating agency chu a chhui hna a zawh tawhna chinte chu charge sheet a thehluh phalsak mai turin a ngen a ni.

ASG chuan, "Charge sheet thehluh thuai a nih loh chuan thil dik lo tia puhte chuan chhuanlamah hmangin, bail-in an chhuak thei mai dawn a ni," a ti.