India sipai lu tansaktu Pakistan firfiak kap hlum
Kum 2013-a India sipai pakhat lu tansaktu nia puh, Pakistan firfiak chu Jammu and Kashmir-ah security force-te'n an kaphlum. Rawng taka sipai thah hian India leh Pakistan inlaichinna pawh a nghawng phah hle.
Pakistan firfiak pawl, Laskhar-e-Taiba-a divisional commander, Anwar Faiz chu Thawhṭanni khan Jammu and Kashmir-a Rajouri-ah sipaite'n an that niin an sawi.
Anwar Faiz hian kum 2013, January 8-a Lance Naik Hemraj Singh lu a tansak hnua social media-a video a upload aṭangin tunge a ni tih hriatchhuah a ni tih sipaite chuan an sawi.
Faiz hi firfiak dang pahnih nen Sangrila-ah India rama rawn luh ruk an tum lai hmuh a ni a, Border Security Force leh Indian Army-te'n beihpui an thlaknaah an kaphlum a ni. A ruang bulah hian AK-47 rifle, India leh Pakistan pawisa, bomb, wire-cutter leh mobile te hmuh a ni.
Lance Naik Hemraj Singh thah chungchangah hian a tirah chuan Pakistan sipaite puh an ni a, he thil thleng vang leh Jammu and Kashmir-a inkahhai thuthlung palzut a nih fo avangin ram pahnihte inlaichinna pawhin a chhiat phah hle a ni.