Nagpur-ah tualchhung buaina chhuak vangin mi 50 man

Nagpur, Maharashtra-ah Thawhṭanni khan, Aurangzeb-a thlan Khuldaba-a awm tih bo duh avangin right-wing organisation lam chuan lungawilohna an lan tir. Hemi kaihhnawihah hian tual chhung buaina chhuak zuiin, pawikhawihna nasa tak a thleng tih police-in an tarlang. Chief minister Devendra Fadnavis chuan, heng pawikhawihna thleng a inhnamhnawihte lakah na taka hmalak a nih tur thu a sawi.

Police commissioner Ravinder Singal chuan, buaina chhuak kaihhnawihah hian mi 50 lai chu thuneitute hnenah an chhungthu ngaihtuah tura lak nghal an nih bakah, police station hrang hrangah FIR panga theh luh a nih thu a sawi. Nagpur huam chhung hmun hrang hrangah curfew puan a ni zui bawk.

Tualchhung buaina chhuak avang hian nimin Thawlehni thleng khan Maharashtra Chhatrapati Sambhajinagar district a Khuldaba hmuna Aurangzeb-a thlan chu venhimna khauh zawk siama ven chhunzawm leh a ni. Mimal in leh lirthei eng emaw zat suasam niin, police mi 34 leh vantlang mi pali ten hliam an tuar bakah hliam tuar zinga pahnih chu ICU-a enkawl zui an ni bawk.

District Guardian Minister Chandrashekhar Bawankule chuan Nagpur police commissioner leh district collector te nen thil thlen dan thlirletna hun hman an hmang dawn tih a sawi. Thuthang diklo a darh lohna turin sorkar chuan social media account a thlithlai zui dawn, tih sawiin Bawankule chuan, "Sorkar din na chu Hindu leh Muslim-te in lungrual taka chen ho theihna chu a ni, tun hmain hetiang thil hi ala thleng ngailo a ni" a ti.

Thawhṭannia pawikhawihna chhuak vang hian Bahujan Samaj Party(BSP) chief Mayawati leh eptu pawl Shiv Sena hruaitute chuan Devendra Fadnavis kaihhruai sorkar chu an dem thu sawiin, thil thlenga pawi khawihtute laka hmalakna khauh tak nei turin an phut thu an sawi. BSP hruaitu Mayawati chuan X-ah ,"Maharashtra-ah hian tu thlan emaw, thlanmual emaw tihchhiat emaw chu thil dik lo a ni, a chhan chu hei hian inunauna ṭha, remna leh muanna a tichhe thei a ni" tiin tarlang.