Sonia Gandhi-in MGNREGA fund tih hniam sawisel

Congress MP Sonia Gandhi chuan tun budget sesion kal mekah, sorkar laipuiin Mahatma Gandhi National Rural Employment Guarantee Act (MGNREGA) atana sum hman tur an tihniam chungchangah, nimin Thawhlehni khan budget hman tur ruahman chu a duh khawp loh thu a sawi chhuak.

Gandhi chuan Upper house ah thu sawiin, tuna rorellai BJP-in Dr Manmohan Singh hunlaia a kaihhruai UPA in an lo kalpui ṭhin, hmalakna tur an ti tlem chu a duh loh thu sawiin,"BJP sorkarin he scheme an ngaihthahna hi ka ngai thutak hle a, he mi hnuaia hmalakna tur atan hian budget ruahmanah sum hman tur chu Rs vbc 86,000 chauh an dah a ni" tiin ruahmanna siam ṭha tawklo thu a au chhuah pui a ni. Gandhi chuan sawi zawmin sum ruahman hi Rs vbc 4,000 laia tih tlem a nih thu a tarlang bawk.

Congress MP chuan MGNREGA scheme-in harsatna a tawhte sawi langin, hnathawktu ten hlawh lakna tur atana Aadhaar-based payment system, National Mobile Monitoring System hman te chuan hlawh lak a tih khawtlai thu leh, thil hlutna danglam a zira hlawh tih danglam a nih ngailoh thu a sawi bawk. Hengte avang hian he scheme hnuaiah hian hlawh bithliah hniam berah Rs 400 tal ni thei se tiin a duhkhawp lohnate hi a tarlang.

Gandhi chuan MGNREGA hnuaia hnathawh hun chhung chu, kum khatah ni 100 aṭanga ni 150 tal ni thei se a tih bakah, heng hmalaknate hi thingtlang mi rethei maktaduai tam takte tan hnathawh zahawm tak leh sum leh pai lama intodelhna a pek theih nan a pawimawh hle tih a sawi bawk.