India MLA hausa berin Rs vbc 3,400 thil hlu nei, rethei berin Rs 1,700 hu chauh

Association for Democratic Reforms (ADR) report-ah India chhunga political party hruaitu hrang hrang hausakna hlut zawng an zirchianna thar berah BJP MLA Ghatkopar East, Mumbai bialtu Parag Shah chu MLA zinga hausa ber niin RS vbc 3,400 hu thil hlu a nei. Congress hruaitu Kolkata-a Kanakapura bialtu MLA DK Shivakumar chuan Rs vbc 1,413 neiin a dawt a ni.

Zirchianna neih hi state 28 leh union territory pathum huamchhunga MLA 4,092 te laka zirchianna an neih niin inthlan hnuhnung bera an affidavit thehluh aṭanga teh a ni. Hausakna tehna ah hian BJP MLA West Bengal, Indus bialtu Nirmal Kumar Dhara chu rethei ber niin a thil hlu neih zawng zawng belhkhawm hi Rs 1,700 chauh a ni thung. MLA hausa tehna top-10 ah hian Andhra Pradesh aṭangin MLA pali langin, top-20 ah MLA pasarih an lang bawk.

State hrang hranga MLA-te hausakna chu a in anglo hle a, Karnataka MLA member 223 hausakna neihzat belhkhawm chu Rs vbc 14,179 niin an sang ber an ni, Maharashtra chuan dawtin MLA-te hausakna belhkhawm hi Rs vbc 12,424 tlingin, Andhra Pradesh MLA member 174 te hausakna belhkhawm chu Rs vbc 11,323 a tling bawk a ni.

MLA 4,092-te thil neih hlut zawng belhkhawm chu Rs vbc 73,348 niin, kum 2023-24 chhunga Nagaland (Rs vbc 23,086), Tripura(Rs vbc 26,892), Meghalaya(Rs vbc 22,022) te budget belhkhawm aiin a tam zawk a ni. MLA thil neih hlut belhkhawm tlemna ber state te chu Tripura, West Bengal, leh Kerala-te an ni.