Maoist mi leh sa 22 kah hlum an ni, police pakhatin nunna chan

Bijapur district leh Kanker district, Chhattisgarh-ah nimin Ningani zing dar 7 vel khan police leh Maoist-te inkapin, Maoist mi leh sa 22 kah hlum an ni. Inkahna thleng vang hian police pakhatin nuna a chan ve bawk. Inkahna hi State Task Force leh District Reserve Guard (DRG) te ṭang kawpin anti-Naxalite beihpui thlakna an neih laia thleng a ni.

Inkahna chhuak hi hmun hrang ve ve ah niin, Gangaloor police station huam chhungah leh district inrina Dantewada hmunahte a ni. Kanker district huam chhung Koroskodo thingtlang khaw bula inkahna chhuakah hian Maoist hel pawl mi leh sa pali kah hlum niin, Gangaloor police station huam chhung in kahna ah hian Maoist mi leh sa ruang 18 bakah silai leh a mu bakah puakthei thil eng emaw zat man a ni bawk.

Bijapur district huam chhungah hian thla hmasa khan venhim hna thawktuten Maoist mi leh sa 31 zet an lo kap hlum tawh bawk a ni. Hemi ṭum a inkahna thlengah pawh hian police mi lehsa pahnihin nunna an lo chan tawhin, January thla khan anti-maoist beihpui thlakna kal zelah Maoist senior leader Jayaram Reddy 'Chalapati' tia hriat chu thah a lo ni tawh bawk.

Chhattisgarh-ah hian nikum 2024 chhung khan Maoist mi leh sa 200 chuang thah an lo ni tawh a, Maoist mi leh sa 219 thah zinga 217-te hi Bastar huamchhungah niin beihpui thlakna hi Bastar, Dantewada, Kanker, Bijapur, Narayanpur, Kondagaon and Sukma district-ah te neih a ni. Beihpui thlakna kal zelah hian Maoist 800 man tawh niin midang 802 in silai an tung bawk a ni.