PM-in ram 38 a tlawhna sensoah Rs vbc 258 dawn hmang

Prime minister Narendra Modi-an May 2022 leh December 2024 inkar chhunga ram dang a tlawhna senso ah Rs vbc 258 dawn hman a nih thu sorkar data chuan a tarlang.

PM Modi hian hemi hun chhung hian ram 38 a tlawh hman a ni. A zin chhuahnaah a senso tamna ber chu June 2023-a US a tlawh kha niin, Rs vbc 22 hman ral a ni.

Rajya Sabha-a Leader of Opposition Mallikarjun Kharge-in kum thum chhunga PM zinna atana sorkar sum sen tawh zat a zawhna chu minister of state for external affairs Pabitra Margherita-in ziakin a chhang a ni. PM-in 2023-a US a tlawhna atan khan Rs 22,89,68,509 sen a ni a, September 2024-a PM-in US a tlawh lehnaah khan Rs 15,33,76,348 chu hman ral leh a ni. Japan a tlawhna sensoah Rs 17,19,33,356 hmangin Nepal a tlawh ṭum khan Rs 80,01,483 hman a ni bawk.

PM-in ram hrang hrang a tlawhna atana sum hman zat tarlanah hian, kum 2024 a ram dang a tlawhnaah khan sum seng tam berin Poland a tlawhna atan Rs 10,10,18,686, Ukraine tlawh ṭumah Rs 2,52,01,169, Russia tlawh nan Rs 5,34,71,726, Italy tlawh nan Rs 14,36,55,289, Brazil tlawh nan Rs 5,51,86,592 leh Guyana tlawh nan Rs5,45,91,495-te hman ral a ni.