Uttarakhand CM-in hmun hlui hming thlak tur thu puang

Uttarakhand chief minister Pushkar Singh Dhami chuan Uniform Civil Code leh anti-conversion law an hman hnuah, state chhunga hmun hrang hrang 15, Mughal hunlaia an hming put tirte chu thlak a nih tur thu a puang. Heng hming thlak tur puan zingah hian assembly constituency pakhat leh municipal council an tel.

CM Dhami chuan hming thlak danglam turte state chhunga hmun hrang hrang Haridwar, Dehradun, Nainital, leh Udham Singh Nagar te'n vantlang nunphung an nghawng dante sawiin, India hnam ziarang leh nunphung nasa tak a nghawng vangin heng hmun hming hrang hrangte hi thlak an nih thu a sawi.

Hming thlak danglam tur tarlanah hian Haridwar district-a awm Aurangzebpur chu Shivaji Nagar tia thlak tur niin, Gaziwali chu Arya Nagar, Chandpur chu Jyotiba Phule Nagar, Mohammadpur Jat pawh Mohanpur Jat-ah thlakin, Khanpur Kursali chu Ambedkar Nagar, Indridhpur chu Nandpur, Khanpur pawh Shri Krishnapur, leh Akbarpur Fazalpur chu Vijayanagar tia thlak tura ruahman a nih thu CM hian a puang.

Heng hmun hming thlak bakah hian, Nainital district-a awm Nawabi Road chu Atal Marg tihin thlak tum a ni a, Panchakki aṭanga ITI panna kawng pawh Guru Golwalkar Marg tih a ni dawn bawk. Heng bakah Sultanpur Patti Municipal, Udham Sing Nagar a mi pawh chu Kaushalya Puri tia thlak tum a ni.

Dhami chuan," Hming thlak hian mipuite thinlungah heng hmun humhalh leh ngaihhlutna kawngah a ti phurin, India hnam ziarang leh nunphung nasa taka nghawng leh siamtute zahna an lantir phah dawn a ni" a ti.