Indian Navy-in ruihhlo kg 2,500 an man

Indian Navy indo lawng, mission kalpui tura thawn chhuah INS Tarkash chuan nimin, Nilaini khan Indian Ocean-a lawng aṭangin ruihhlo tam tham tak an man.

INS Tarkash hian tuipui lamah venhimna kalpui hna thawkin, March 3 khan an patrol laiin Indian Navy P81 aircraft aṭangin tuipuia lawng ṭhenkhatah thil rinhlelhawm tak a awm nia a lan thu an dawng a ni. Hei hi bawhzuiin hma an la nghal a, lawng eng emaw zat chu an chhui zui nghal a ni.

Navy team, Maritime Commando te telna chuan lawng pakhat dapin, ruihhlo kg 2,500 vel an man a ni. An ruihhlo man hi hashish kg 2,386 leh heroin kg 121 te an ni. Ruihhlo an manna lawnga thawkte chu thu zawhfiah an ni bawk.

"INS Tarkash hian a chhehvela lawng rinhlelh awm zawng zawngte chu uluk leh awmze nei taka an zawhfiah hnuah, rinhlelh lawnglengte chu an man a ni, hmalakna hi P8I leh Mumbai-a Maritime Operations Center nena thawhhona ṭha tak hnuaiah hlawhtling taka neih a ni" tiin Navy lam chuan an hmalak dan hi an sawi.

Indian Navy hian Indian Ocean Region (IOR) huam chhung a venhimna khauh zawk kalpui a nih theihna turin hma an la ṭhin a ni. Indian Ocean khawthlang lama tuipui chunga venhimna hrang hrang kalpui tur hian, January 2025 aṭang khan INS Tarkash hi thawn chhuah ṭhin a ni. Tarkash hian Combines Task Force (CTF) 150 chu a pui ṭhin a ni. Tarkash hi Australia leh New Zealand ṭangkawp, Anzac Tiger multi-national force thawh dunna thlawp tura tih a ni bawk.