J&K LoC-a inkahhai puan Pakistan-in bawhchhia

Jammu and Kashmir-a Poonch biala Line of Control (LoC)-a Pakistan leh India-in inkahhai puan bawhchhiain, Pakistan sipai te'n tum bik nei loin silai an hmet puak a, ramri pelin buaina an siam niin an tarlang. Army Public relation Officer Lieutenant Colonel Suneel Bartwal chuan India sipaiin an chhan let thu nimin Nilaini khan a tarlang bawk.

Pakistan sipaite ramri rawn pelh avang hian Thawhlehni, April 1 khan rahpuah bawm a puak bawk. Hei hi Pakistan sipaiten inkahhai puan bawhchhiaa silai an pawng kah hnu lawka thil thleng niin Bartwal chuan a sawi. He thil thleng avang hian Pakistan lam sipai zingah hliam tuar pawh an awm niin an tarlang.

Colonel Bartwal chuan Indian Army chuan ram pahnih Director General of Military Operations (DGMO) inkara thuthlung siamte vawn tlat a pawimawh thu a sawi nawn leh a, Line of Control-a remna a awm theih nan a pawimawh thu a sawi bawk.

India hian Pakistan nen ramri km 3,323 a thui inṭawmin, heng ramri inṭawmte hi hmun thumah ṭhen an ni a, International Border(IB) km2,400-a thui niin Gujarat aṭanga Ankoor, Chenab lui kam hmarlam thleng a awh. Line of Control(LoC) chu km 740-a thui niin Jammu aṭanga Leh thleng a huam a, Actual Ground Position Line(AGPL) hian km 110-a thui a huam bawk a ni.