India leh Nepal-in MoU an ziak

India leh Nepal chuan thawhdunna tur, Nepalese Rs mtd 625 hu Memorandums of Understanding (MoU) 10 an ziak. Inremna an ziah hi education, health leh cultural sector huanga hmasawnna hna thawhna tur a ni.

‘Nepal-India Development Cooperation' hnuaia thawh dunna tur, MoU hi Thawlehni, April 1 khan ziah a nih thu Kathmandu-a India embassy chuan a tarlang.

Ram pahnihte thawhdunna tur project hrang hrangte hi sum lama India puihna hmangin thawh a ni ang. Heng hmalakna hian Nepal mipui te tan zirna huangah hmasawnnate, hriselna hmasawnnate, leh hnam nunphung tih hmasawnna kawngahte nasa takin a pui thei dawn a ni. Project hnuaiah hian sikul pathum sakna turte, monastery pakhat saknaturte, sikula library siamna tur bakah damloh nikhuaa in enkawlna tur building pahnih sakna tur te a huam tel bawk.

Thawhdunna tur an ziah thar leh nen hian India chuan kum 2003 aṭang khan Nepal-ah High Impact Community Development Projects (HICDP) 573 chuang thawk tawhin, heng zinga project 495 chu zawh fel a ni tawh bawk a ni.