State pangain lockdown pawtsei tawh

Odisha chief minister Naveen Patnaik chu lockdown pawtsei hmasa ber niin, April 30 thleng an state-ah kharkhipna hi hman chhunzawm a ni dawn tih a puang. June 17 thleng state chhunga school leh zirna in dangte khar a ni tur thu a sawi bawk. 

Punjab chief minister Amarinder Singh chuan April 10 khan an state-ah tun thlan chhung atan lockdown pawhsei a nih tur thu a puang zui ve leh a, mipuite chu an himna tura pawn chhuak lo chhunzawm zel turin a ngen. 

Kar liam ta Inrinni khan prime minister Narendra Modi chuan ram chhunga hri leng mek chungchangah chief minister-te chu video conference hmangin meeting a neihpui a, meeting-a tel CM tam zawk chuan lockdown pawhsei hi an rawt. PM Modi pawhin an rawtna hi ṭha a tihpui nia hriat a ni a, mahse sorkar laipuiin a ngaihtuah phawt hnuah thutlukna hi siam a ni ang. 

Inrinnia PM hoa meeting neih zawh hnuah, Telangana sorkar chuan an state-a hri darh zel tur venna atan April 30 thleng lockdown pawhsei a nih thu a puang zui ve leh. Chief minister K Chandraskhar Rao chuan Telangana venhimna tur chuan theihtawp chhuah a ngai tih a sawi. 

Maharashtra chief minister Uddhav Thackeray pawhin Inrinni vek khan April 30 thleng lockdown hi an pawtsei ve leh tih sawiin, hemi hunah pawh hri lengin ziaawm lam a la pan loh chuan a aia rei zawk inkharkhip tur pawha mipuite inbuatsaih turin a chah nghal. 

West Bengal sorkar pawhin tun thla chhung atan lockdown hi an state-ah pawhsei a nih thu a puang ve bawk a, June 10 thleng zirna in hrang hrangte khar a ni ang, a ti. State chief secretary Rajiva Sinha chuan an state-a Covid-19 kai hmun tamna hmun 10-te chu 14 chhung 'total lockdown'  a ni dawn tih a sawi.