Tripura-in chanchinbu semte Rs 1,000 ṭheuh sem dawn
Tripura sorkar chuan lockdown avanga hna thawh chhunzawm thei loa awm, state chhunga chanchinbu semte chu ṭanpuina Rs 1,000 ṭheuh a pe dawn.
Chanchinbu sem mi 372 hnenah he ṭanpuina hi sem a ni dawn a, Chief Minister's Relief Fund aṭangin pek a ni ang. Chanchinbu semtute hi mi ṭhenkhatin chanchinbu chu hri thehdarh theihna anga an ngaih avangin an sem chhunzawm thei lo tih an sawi.
Nagaland-ah vawiin atangin office kal dawn
Nagaland-a sorkar office zawng zawngte chuan vawiin aṭang hian hna an thawh chhunzawm leh tawh dawn a, mahse staff a tlem thei ang an kal thung ang.
Chief minister Neiphiu Rio chuan Inrinni khan deputy commissioner-te kaihhruaina hnuaia district task force zawng zawngte chu video conference hmangin meeting a neipui bawk.
State sorkar chuan department hrang hrang hotute chu an staff-te inkal chhawk dan turte ruahmanna siam turin a ti a, office-a kal kher loh pawhin telephone leh thil dang hmanga biakpawh thei renga awm tura tih an ni. Office hawn hunah pawh thawktue chu social distancing rules chu hmang zel turin chah an ni bawk.
Meghalaya MLA-ten Covid-19 do nan
Kum khat chhung an hlawh 10% pe dawn
Meghalaya Assembly Speaker Metbah Lyngdoh chaun state MLA 60-te chuan kum khat chhung an hlawh aṭanga 10% chu novel coronavirus dona atan Chief minister's Releif Fund-ah chhun luh an remtih thu a sawi.
Speaker chuan MLA-te hian lungrual takin CM Relief Fund-a chhun luh hi an rel tih sawiin, April 2020 aṭanga March 2021 inkar hlawh aṭangin an pe dawn a ni, a ti. Phur tak leh lungrual taka he thutlukna an siam avang hian a lawm thu sawiin, an state tana theihtawp chhuaha inlungrual taka an kal hun a ni tih a sawi