PM-in BIMSTEC nena UPI thlunzawm a remti

Prime minister Narendra Modi chuan Bangkok, Thailand-a BIMSTEC summit vawi rukna hman mekah, India kutchhuak UPI payment system chu member ramte nena thlunzawm vek a rem tih thu a tarlang. Hei bakah hian BIMSTEC Chamber of Commerce din pawh a rawt bawk. BIMSTEC summit-ah hian India, Bangladesh, Nepal, Myanmar, Sri Lanka, leh Butan hruaitute an tel a ni.

PM-in hmalakna hrang hrang tur a sawite chu BIMSTEC huamchhunga awm ramte hmasawnna thlen thei tur atana tih a ni. Heng ruahmannate kaltlang hian in sumdawn tawnna a tih hmasawn theih tur thu a sawi lang bawk. PM hian BIMSTEC Centre for Excellence for Disaster Management chu India-a din rawtin, hei hian chhiatna lo thlen thulha in puih thuai theihna tur atana tih a ni bawk.

BIMSTEC summit neih kar lakah nimin Zirtawpni khan PM Modi leh Bangladesh chief advisor Mohammad Yunus-te chu minute 40 bawr vel an inkawm. Ram pahnih hruaitute inkawmna kimchang hi Ministry of External affairs chuan vawiin lam hian an ti chhuak dawn niin an tarlang.

Summit hmanga kal, Myanmar senior general Min Aung Hlaing leh PM Modi te pawh in kawmin, kar hmasaa lirnghing na tak thleng vanga harsatna an tawhte chu a hriatthiam pui thu leh chhawmdawlna pawh an thawn thuia tur thu PM hian a hrilh nghal bawk.

Myanmar lirnghing vang hian mi 3,000 chuangin nunna an chan tawh bakah mi 5,000 dawnin hliam an tuar a, chin hriat lohin eng emaw zat an la awm bawk.