Indian Surgical Strike Pakistan ramri bul state-te Inralring turin hriattir

India sipaiten Nilaini zan zanlaia Pakistan ram chhunga surgical strike an neih avangin ram pahnihte inkar boruak a ṭang hle a, Pakistan ramri bula state-te chu inralring tura hriattir an ni.

Nimin khan Punjab, Jammu and Kashmir leh Rajasthan state-a Pakistan ramri bul hnaia khaw awmte chu sawnchhuah an ni. International border aṭanga km 10 huam china awmte chu sawnchhuah niin, mi nuai hnih chuang chu hmun him lamah dah an ni.

Ramri vengtu, Border Security Force chuan unit zawng zawng chu International Border-ah venhimna khauh zawka kalpui turin a hriattir nghal a, post hrang hranga duty turin reserve-a awm mekte pawh a ko vek.

Surgical strike neih chungchangah Union Home Minister Rajnath Singh chuan Ningani khan all party meeting a ko nghal a, political party zawng zawng chuan sipaiten Pakistan ram chhunga firfiakte tawmbuk beia beihpui an thlak chu an thlawp vek tih sawiin, firfiaka chetna thleng ṭhin chu India chuan a ngaizam mai mai dawn lo tih an sawi.

Sipaiten beihpui an thlak lai hi camera hmanga record vek a ni a, sorkar laipui chuan video footage hi tihchhuah a nih dawn leh dawn loh a la ngaihtuah ang. Hmun ṭhenkhat chu drone hmangin an bei nia sawi a ni. An beih tur hmunte hi a hmain uluk takin an lo zirchiang tawh a ni.