Firfiak tawmbuk pasarih tichhia

Pakistan ram chhunga surgicial strike nei tur hian a ram chinchang hrechiangtu, Ghatak platoon-a 6 Bihar leh 10 Dogra-a special commander tirh an ni. Commando tirhte hi 100 an tling lo deuh a, group 20-ah an inṭhen nia sawi a ni. Nilaini zanlai vel khan Dhruv Advanced Light Helicpter hmangin commando-te hi Pakistan occupied Kashmir (PoK) ah dah luh an ni a, helicopter hi a let leh nghal a ni. Commando-te hi Pakistan ram chhunga an tum hmun bei tur hian km thum vel chu lung leh dum hmunah an vak lut a ni. Bhimbar, Kel, Tatapan leh Leepa biala firfiakte tawmbuk pasarih beiin, firfiak 50 vel an kaphlum.

Commando te hian Israel siam Tavor assault rifle leh M-4 gun, grenade leh smoke grenade an hmang a, under barrel grenade launchers (UBGL) bakah night vision device kengin, camera nena thuam helmet an khum bawk. Zing dar 4.30 velah beihpui thlak hi an zo a, commando zinga pahnihte chuan hliam na vak lo an tuar.

Commando-te helmet-ah camera vuah a nih avangin beihpui an thlak lai hian New Delhi-a Army headquarters aṭangin Defence Miniser Manohar Parrikar, National Security Advisor Ajit Doval leh Army Chief General Dalbir Singh Suhag-te chuan lo thlirin an lo vil ve reng a ni. Prime Minister Narendra Modi pawh thil awmdan hrilh hriat reng a ni bawk.