Pakistan media-te an pha

Indian Army-te'n surgical strike an neih hnuah  media lamah report hrang hrang a tam nghal hle. China pawhin  hemi chungchang hi a ngaihven nghal hle a, China media-te chuan India hian nuclear ralthuam phur thei a lei thar, Rafale fighter aircraft chu Pakistan leh China nena an ram inchuh buai mekah hian a dah dawn niin an sawi. Tun hnaiah sorkar laipuiin dollar maktaduai 8.7 senga France ram aṭanga Rafale fighter jet 39 lei turin inremna a ziakfel a,  heng jet fighter te hian India ram chhung aṭangin Pakistan leh China-a an target-te an kapfuh thei dawn nia sawi a ni. Mahse jet fighter-te hi kum thum hnuah India kuta hlan theih an ni chauh ang. 

Hetih lai hian Pakistan media-te chuan India sipaiten surgical strike an nei nia sawi hi thu dik lo niin an sawi thung. Geo TV chuan India thusawi hi thu dik lo a ni a, India mipuite tihlawm tuma thu belhchian dawl lo puangah an puh. Pakistan military thuchhuah chuan LoC-ah ram pahnih sipaite inkahnaah Pakistan sipai pahnih an thi a, Pakistan ram chhungah surgical strike an nei lo a, hei hi thleng ni se na taka an beihlet tur thu a sawi.