Firfiakten Baramulla-a army camp bei

Jammu and Kashmir-a Baramulla army camp chu Pathianni zan khan firifakten an bei a, sipai pakhat a thi. Firfiakte hi an tlanchhe zui a ni.

Army camp beitu firfiakte hi pathum emaw pali emaw vel nia rin an ni a, sipaite nen hian darkar hnih vel an inkah hnuah an tlanchhe zui a ni. Security force-te chuan nimin zing khan hel zawngin beihpui an thlak nghal a, Baramulla highway pawh khar a ni.

Firfiakte hian Pathianni zan dar 10.30 vel khan Jammu and Kashmir khawpui, Srinagar aṭanga km 60 vela hla, Baramulla-a 46 Rashtriya Rifles leh a bula BSF camp an bei a, silai leh grenade an hmang a ni. Army camp beitute hi Jhelum lui kaltlangin India ramah an rawn lut nia rin a ni bawk.

Union Home Minister Rajnath Singh leh National Security Adviser Ajit Doval-te chu Baramulla-a thil thleng chungchang hi hrilh nghal an ni a, Doval pawhin nimin zing vek khan Prime Minister Narendra Modi hmuin thil awmdan a hrilh nghal a ni.

Sipaite chuan army camp beihna hmunah hian GPS, wire cutter leh hmanraw dang ṭhenkhat an hmu tih an sawi. Sipai hotute chuan zan lama thil thleng a nih vang leh, civil mite kah fuh palh an hlauhthawn avangin an duh angin an che ngam lo a, firfiakte hi an tlanbo theih phah niin an sawi. Firfiakte hian camp hi luhchilh an tum a, mahse sipaiten an lo dang thei niin IG BSF (Kashmir) Vikas Chandra chuan a sawi.

Defence Minister Manohar Parrikar chuan high level meeting a ko nghal a, defence lam hotute chu Baramulla beih a nih dan leh, Line of Control (LoC)-a Pakistan leh India boruak ṭang chho mek chungchangte a sawipui.