SC-in Delhi Health Minister sum chawitir

Supreme Court chuan Delhi Health Minister Satyendra Jain chu Delhi khawpui chhunga chikungunya leh dengue hri leng mek dolet beihpui thlaknaa sorkar official zinga thawk ṭha duh lote hming list a theh luh loh avangin Rs 25,000 a chawi tir.

Aam Aadmi Party (AAP) Minister hian hri leng mek khuahkhirh tuma hma an lak meknaah sorkar officer ṭhenkhat chuan an thawhpui ṭha lo hle nia sawiin, Lieutenant Governor Najeeb Jung hnenah lehkha a lo thehlut tawh a ni. Kar kalta Zirtawpni khan Supreme Court chuan minister hnenah hian officer a sawite hming list hi thehlut turin a lo hriattir tawh a ni.

Minister hian officer-te hming hi a thehluh loh avangin Supreme Court chuan Rs 25,000 chawi turin a ti ta a ni. Delhi sorkar chuan court-in affidavit thehlut tura a tih hi a tih theih mai loh thu a sawi a, nimin khan thehluh a tum tih a sawi. Mahse court chuan, "Mipuiten an thihpui mek a, darkar 24 nghah kher a ngai lo", tiin list a thehluh pawh chu sealed cover kher a ngai lo tih a sawi bawk. Delhi khawpui chu natna hri leng laka tihfihlim chu Delhi sorkar mawhphurhna a ni, a ti.