Ni nga cham turin Singapore PM a rawn zin

Singapore Prime Minister Lee Hsien Loong chu ni nga cham turin nimin khan New Delhi a rawn thleng a, a nupui Ho Ching bakah minister leh official pawimawhten an rawn ṭawiawm.

Prime Minister Narendra Modi chuan Singapore PM hi chaw chhun a buatsaih sak dawn a, ram pahnihte thawhdunna ṭha zawk siam dan tur ngaihtuahin an inkawm zui bawk ang. Vawiina Department of Industrial Policy and Promotion leh Singapore Intellectual Property Office-te'n thawhdunna tur, Memorandum of Understanding (MoU) an ziah tur pawh an telpui dawn a ni.

Lee hian President Pranab Mukherjee pawh a kawm dawn a, India rama Singapore mi awmten inkhawm an buatsaihah a telpui bawk ang. External Affairs Minister Sushma Swaraj-i nen pawh an inkawm dawn a ni.

October 5-6 ah Singapore PM hian Udaipur, Rajasthan a tlawh dawn a, nikum November thlaa India-Singapore Strategic Partnership siam hnua Centre of Excellence for Tourism Training siam chu a hawng dawn a ni. Rajasthan sorkar leh Singapore International Enterperise-in tourism leh urban solution lama thawhdunna an ziah pawh a tel pui ang.