Ramchhung Lawrkhawm

Retreat ceremony-ah India dodalna thu aupui

Punjab-a Pakistan ramri, Attari-Wagah border-a Pakistan ram chinah Pathianni khan sipaiten retreat ceremony an neih laiin mipuiten India dodalna thu an aupui a, India lam hawiin lungte an vawm bawk.

Ramri-ah hian tlai tin retreat ceremony hi neih ṭhin a ni a, he hun hi mipuiten an chhim thei a ni. Mipuite hmuh laiin ram pahnih sipaite hian hnam puanzarte tihniamin, ramri gate an khar a ni. Pakistan firfiakten Uri-a army camp an beih avanga sipai 19 in nunna an chan hnuah, ram pahnihte inkar boruak hi a ṭha lo hle a, tunhnaiah India sipaite chuan Line of Control kaltlangin Pakistan ram chinah surgical strike an va nei zui leh bawk a ni.

2017 Republic Day khuallian atan Abu Dhabi Crown Prince

Kum 2017 Republic Day lawmna neih turah Abu Dhabi Crown Prince Sheikh Mohammed bin Zayed Al Nahyan chu khuallian a ni dawn.

Khuallian tura awmna hi kumtir lam khan pek a ni tawh a, hei hi a pawm thu sawiin Mohammed bin Zayed chuan, "Ram pahnihte inzawmna nghet tak hi hmanlai aṭang tawha awm tawh a ni a, kan thawhdunna pawh a tha chho zel a, hmasawnna duh ve ve kan neihna chuan hmalam min pantir a ni", a ti.

Home Minister-i Ladakh tlawh

Union Home Minister Rajnath Singh chuan ni hnih cham turin nimin khan Jammu and Kashmir-a Ladakh bial a tlawh.

Jammu and Kashmir-a hun rei tak chhung tualchhung buaina thleng chinfel dan kawng ngaihtuaha sorkar laipui chuan hma a la reng a, Singh hian a cham chhungin Leh leh Kargil-ah pawl hrang hrang aiwhte a kawm ang. Tunhnaia Jammu and Kashmir a tlawh ṭum li-na a ni a, thla hmasa khan all party team nen Srinagar leh Jammu an lo tlawh tawh bawk a ni.