Kejriwal-a'n surgical strike finfiahna phut

Delhi Chief Minister Arvind Kejriwal-a chuan Indian Army-te'n Pakistan ram chhungah surgical strike an nei ngei tih finfiahna pe turin sorkar laipui a phut.

Arvind Kejriwal-a hian Thawhṭanni khan minute thum awh video a tichhuak a, Prime Minister Narendra Modi chu firfiakte beihlet duhna tak tak a lantir avangin a fak a, hemi rual hian kar hmasaa sipaiten surgical strike an neih chungchang, Pakistan lamin thu dik lo nia an sawi chu a tak ngei a ni tih finfiahna phochhuak turin a phut thu a sawi.

Kerjiwal chuan Indian Army te fakin, PM Modi pawh a fak thu a sawi. "PM nen hian duh dan in ang lo tam tak kan nei ngei ang, mahse firfiakte beihletna kawngah hian lawmthu ka hrilh a ni", a ti. Mahse surgical strike neih chungchang hi Pakistan lam chuan thu dik tawk lo a ni tih sawiin, thil danglam engmah a thleng lo tih entir turin foreign journalist-te chu Line of Control bulah an hruai a ni, a ti. Hetiang report a awm hian a ti thinur hle tih sawiin, ramdang media-te'n India thiltih ringhlel zawnga zawhna an nei chu
ṭha a tih loh thu leh, surgical strike chu neih a ni ngei tih finfiahna pe turin PM chu a ngen tih a sawi. Hetih lai hian Congress hruaitu, Sanjay Nirupam pawhin kar hmasaa PoK-a Indian army ten surgical strike an nei nia sawi chu thu dik lo a ni, a ti. Hemi chungchang hi a twitter-ah ziakin, Nirumpam chuan BJP-te'n politics lama hlawkpui tumin thu dik tawk lo an thehdarh niin a sawi a, India mipuite chuan a lem ni lo, surgical strike tak tak nei se an duh vek a ni, a ti. Sorkar laipuiin finfiahna a tihchhuah hma chuan surgical strike nei ni anga sawi chu a lem anga ngaih a ni reng dawn a ni, a ti.