Karnataka-in Cauvery lui tui pe chhuak

Karnataka state chuan hun eng emaw chen Supreme Court thupek a hnial hnuah, Thawhṭanni zan aṭang khan court thupek angin Cauvery lui tui chu a ṭhenawm, Tamil Nadu state hnenah a pechhuak ṭan ta.

Supreme Court-in Tamil Nadu tana tui pe chhuak tura a hriattirna chu Karnataka hian ṭum hnih a zawm duh lo a, Chief Minister Siddarmaiah kaihhruai sorkar chuan an state chhung loneitute bakah, khawpui lianahte pawh tui an indaih tawk lo niin a sawi.

Mahse Irrigation Minsiter MB Patil chuan Thawhṭanni zan khan an state-a Mandya leh Mysore district-a loneitute tan Cauvery lui tui hi pekchhuah a nih thu leh, Tamil Nadu pawh an pek ve nghal thu a sawi. CM chuan an state mipuite mamawh chu an ngaih pawimawh ber a nih rualin, Supreme Court thupek zawm chu a ṭul tih a sawi.