Ramchhung Lawrkhawm

Jaya-i dinhmun puang turin TN sorkar hriattir

Madras High Court chuan Tamil Nadu sorkar hnenah Chief Minister Jayalalithaa-i dinhmun chu Ningani hmaa puang turin a hriattir.

CM Jaya-i hi khawsik sang leh dehydration avangin ni 12 chhung hospital-ah enkawl a ni tawh a, a dinhmun dik tak hi puanzar a ni lo. Kar kalta Zirtawpni khan Facebook-ah Jaya-i hi a thi tawh nia post a ni a, social media lamah a darh chak hle. He thu post tu lakah hian thubuai ziahluh a ni. Court chuan nimin khan thuchhuah siamin, AIADMK hruaitu J Jayalitha-i chu state sorkar hotu a ni a, hei vang hian sorkar official-te chuan October 6 hma ngeiin a hriselna dinhmun dik tak chu an sawichiang tur a ni, a ti.

Ni thum cham turin Sri Lanka PM a rawn zin

Sri Lanka Prime Minister Ranil Wickremesinghe chu ni thum cham turin nimin khan New Delhi a rawn thleng.

Ranil Wickremesinghe hian a cham chhungin ram hruaitu pawimawhte a hmu dawn a, Prime Minister Narendra Modi nen pawh vawii hian an inkawm dawn a ni. Vawiin vek hian External Affairs Minister Sushma Swaraj, Road Transport and Highway&Shipping Minister Nitin Gadkar bakah Minister of State for Petroleum and Natural Gas Dharmendra Pradhan-te a hmu bawk ang.

Khawpui lian zingah Delhi boruak bawlhhlawh ber

World Health Organisation (WHO) in khawvela megacity boruak a zirchiannaah, Delhi khawpui boruak chu a bawlhhlawh ber. Boruak bawlhhlawh tehna, fine-particulate-matter (PM2.5) level chu mihring tana him tawka ngaih a ni a, safe level aiin a let li zetin a sang a ni.

WHO hian September 22-28, 2016 chhung khan megacity boruakte hi a zirchiang a ni. Zirchianna aṭanga a lan danin National Capital Region (NCR) air quality hi a chhe hle a, mihring hrisel panngai tan pawh a nghawng theih bakah, natna neite tan phei chuan a hlauhawm pha ni niin a sawi. Khawpui boruak bawlhhlawh tehnaah hian Delhi hi Cairo, Dhaka ten an dawt.