Surgical strike : Army-in video footage tichhuak turin duh

Indian Army chuan September 28 zana sipaiten Line of Control (LoC) kaltlanga Pakistan ram chhunga firfiakte tawmbuk bei a, surgical strike an nei lai video footage chu mipui hmuh theh tura tlangzarh a duh a, Prime Minister Office (PMO) thutlukna nghah mek a ni.

India sipaiten surgical strike an neih hi Pakistan lam chuan an pha a, an sipaite pawhin LoC-ah thil danglam thleng a awm lo tih entir turin foreign journalist-te pawh a lo hruai tawh a ni. Hei bakah hian ram chhungah pawh political party hruaitu ṭhenkhatte pawhin surgical strike neih a ni ngei tih finfiahna hi tilang turin sorkar an phut bawk.

Pakistan-in thu dik lo thehdarhah a puh avangin, Indian Army chuan Pakistan chhan letna atan surgical strike neih lai video footage hi tihchhuah a duh a ni. Sipaite hian ramri kanin Pakistan firfiakte hmun an bei ngei tih finfiahna hi video footage bakah, unmanned aerial vehicle (UAV) hmanga thlalak te pawh an nei nia sawi a ni.

Surgical strike neih chungchang hi Pakistan lamin pha mah se, India sipaiten strike an neih ṭuma firfiak an kahhlumte ruang chu a rukin an phum nia sawi a ni. Sipaite hian Pakistan firfiak pawl, Laskhar-e-Toiba ten ramri bula firfiak awmte supply pekna atana an hman ber, Al-Haawi bridge pawh an kapchhia nia sawi a ni bawk.

India sipaiten Pakistan rama surgical strike an nei chu Russia chuan a thlawp thu a lo sawi tawh a, India ram chuan a ram venghim turin dikna a nei a ni, a ti. Hemi hnu hian European Parliament vice president Ryszard Czarnecki pawhin a thlawp thu a sawi a, India-in firfiakte a beihletna kawngah khawvelin a thlawp a ngai a ni, a ti.

Nimin khan Prime Minister Narendra Modi chuan Cabinet Committee on Security (CSS) meeting a ko leh. Meeting-ah hian National Security Adviser Ajit Doval, Home, Foreign leh Defence minister-te pawh an tel.

Meeting ṭan hma hian Ajit Doval chuan Prime Minister Narendra Modi leh Home Mi≠nister Rajnath Singh-te hnenah, firfiakte 100 dawn chu LoC paltlanga India rawn beih tumin an inbuatsaih mek niin a sawi. NSA chuan intelligence agency hrang hrang aṭanga information a lakkhawmte a hrilh nghal. Ajit Doval chuan sipaiten beihpui an thlak hnuah Pakistan ram chinah firfiakte tawmbuk thar 12 vel a awm leh tawh niin a sawi.