India-ah 26/11-a Mumbai beitu Tahawwur Rana rawn thawn

Pakistan-origin Canadian-American Tahawwur Hussian Rana, kum 2008 November 26-a Pakistan firfiakten Mumbai khawpuia an beihnaah a mawhphurtu zinga puh chu nimin khan US aṭangin India-ah rawn thawn a ni a, Delhi-a Tihar Jail-a high-security ward-ah dah a ni ang.

Kum 64 mi, Rana leh a thurualpui, US citizen David Coleman Headley, Daood Gilani tih bawk chu 26/11-a pawikhawihna thleng chungchang ruahmantu ber puh an ni. Mahse Headley erawh India kutah hlan a ni ve lo thung.

Kum 2008 November 26 khan Pakistan firfiak 10 rual chuan Mumbai khawpuia pawikhawihna rapthlak tak thlenin rel station, luxury hotel pahnih leh Jewish center an bei a, darker 60 dawn pawikhawihna an thlenah hian mi 166 an thi a, hliam tuar tam tak an awm bawk.He thil thleng hian India chauh ni loin khawvel pum a ṭhawng hle a, India leh Pakistan inkar pawh a chhiat zual phah hle.

Tahawwur Rana hi Delhi-a Patiala House Court-ah hruai nghal a nih dawn avanign venhimna lam pawh tih khauh nghal a ni. Court pawn lamah paramilitary fore leh Delhi police ṭhahnem ta dah an ni a, court-a kal turte pawh uluk taka enfiah vek an ni bawk.

Union home ministry chuan National Investigation Agency (NIA) in Rana lakah thubuai a ziahluh kaihhnawih hrang hrangah advocate Narender Mann chu special pubic prosecutor turin kum thum chhung atan ruat a nih thu Nilaini khan a lo puang lawk tawh bawk a ni.