PM-in Varanasi-ah project leh scheme hrang hrang hawng

Prime minister Narendra Modi chuan a bial, Uttar Pradesh-a Varanasi chu nimin khan a tlawh a, project hrang hrang 44 hawnna hun leh lungphum phumna hun a hmang nghal. Heng project hrang hrangte hi Rs vbc 3,880 hu senna tur niin Prime Minister Office(PMO) chuan tarlang.

Prime Minister Modi-a'n scheme hrang hrang, thingtlang hmasawnna thlen thei tur a hawn thar zingah hian tui thianghlim siamna tur 130, Anganwadi centre 100, Libraries 356, Pindra-a polytechnic College leh sorkar degree college sakna tur te pawh a tel a ni. PM hian a cham chhungin Ayushman Vay Vandana card chu kum 70 chin chunglam hnenah a hlan nghal.

Modi hian kawlphetha deh chhuahna tur hrang hrang thawhna tur lungphum phum bawkin, hengte hi 400KV pahnih leh 220KV pakhat, transmission substation Rs vbc 1,045 hu senna tur a ni. Heng bakah hian police awmna leh barrack , Provicial Armed Canstabulary(PAC) Ramnagar Campus tih changtlunna tur Transit Hostel a hawn bakah administrative building thar sakna tur lungphum a phum bawk.

Modi chuan kum 19 mi hmeichhia pawngsual rawnna thlenga in hnamhnawihna neite lakah sorkar chu na taka hma la turin a chah bawk. He pawngsual rawnna thleng tuartu hi damdawi hmanga hrai niin a ruih chhung hian hotel hrang hrangah hruai kual niin police chuan an tarlang.