Bihar-ah thlipui leh ṭek thawkah mi 61 thi

Bihar-ah Ningani khan thlipui leh ruahpui thawkin a ken tel ṭek tla vangin mi 61 an thi niin an tarlang. Chhiatna thlengah hian Nalanda district chu thi tamna ber nia tarlan a ni, he district-ah hian ṭek tla vangin mi 22 an thi a ni.

District hrang hrang - Patna, Bhojpur, Siwan, leh Gaya-ah mi pali ṭheuhin nunna chanin, Gopalganj leh Jamui-ah mi pathum ve ve, Muzaffarpur, Jehanabad, Saran, leh Arwal-ah pahnih ṭheuh an thi bawk. Heng bakah Begusarai, Darbhanga, Saharsa, Katihar, Munger, Madhepura, Araria, leh Bhagalpur-ah mi pakhat ṭheuh thi an awm bawk niin an tarlang.

Chhiatna thlen dan kimchang chu Nalanda district magistrate Shashank Bhubhankar chuan sawiin, thi zinga 21 te hi thlipui thawk vang niin mi dang pakhat hi ṭek den niin a sawi. Chhiatna tawkte chhawmdawl hna leh chhanchhuah hna chu thawh mek zel a nih thu a sawi nghal.

Chief minister Nitish Kumar chuan chhiatna thleng vanga mi 60 chuangin nunna an chan chu pawi a tih thu sawiin, nunna chante chu ralna, Rs nuai 4 ṭheuh an chhungte hnenah pek a nih tur thu a puang. Chief Minister chuan mipite chu pawn chhuak lo tur leh, rikrum thil a nih chauh loh chuan in chhunga awm turin a chah nghal bawk.