Kerala ASHA worker ten nawrh chhunzawm dawn

Kerala-a Accredited Social Health Activist (ASHA) worker ten thla hnih chhung an hlawh tih pun ngiata lungawi lohna an lan tir hnu leh tiam chin awm loa chawngheia nawrh an neih tawh hnuah, nimin Thawhlehni khan Thiruvananthapuram-a Secretariat kawtah pung khawm lehin an thil ngiat tih hlawhtlin a nih hma chu sorkar an nawr chhunzawm zel tur thu an sawi. State sorkar chu an inbiakna aṭanga a in hnuhdawh avangin an lungawi lo hle bawk niin an tarlang.

Kerala state ASHA Health Workers Association(KAHWA) vice president S Mini chuan,"Ka thawhpuiten hlawh tih san ngiat an duhna thlente ngaihtuah tura committee din chu lungawi lohna lantira nawrhte tih tawpna atan chauha an hmanraw hman a ni," a ti. ASHA thawktu lungawi lote hian February 10 aṭang khan hlawh tih san ngiat hian Secretariat kawtah an lo pungkhawm tawh ṭhin a ni, nimin kha ni 65 nawrh an huaihawtna a ni tawh.

S Mini chuan sawi zawmin," Sorkarin kan inbiak hnuhnun ber khan committee din a, inbiakna pawh a tuk a neih chhunzawm min tiam. Mahse, a tuk a lo thlen chuan inbiakna a awm tawh loh tur thu min hrilh a, sorkar zawkin an intiam ang lo takin inbiakna hi an ti tawp ta zawk a ni," a ti. Mini chuan sorkar nen a inbiakna chu a vawi ngana turin April 3 khan neih a nih thu a sawi lang.

ASHA thawktuten an hlawh tih pun an ngiat hnuah, Kerala chief minister Pinarayi Vijayan chuan sorkar leh ASHA worker te chu ṭum ruk zet inbiakna an neih thu sawi ve bawkin, thawktute hnathawh tih awlsamna turin hmalakna hrang hrang ruahman a nih thu a tarlang ve bawk a ni.

ASHA worker te hian an hlawh chu Rs 21,000 ah tih pun leh retirement hun atana hlawkna lak tur Rs nuai 5 ruahman sak chu an thil ngaihpawimawh ber a nih thu an tarlang.