Rahul-a'n Kisan Yatra a khar

Congress vice president Rahul Gandh-a'n nakkuma assembly inthlan neihna tur, Uttar Pradesh-a loneitute thlavang hauhna puala ni 26 chhung Kisan Yatra a neih chu nimin khan Delhi-ah a khar.

Kisan Yatra hi September 6 khan UP-a Gorakhpur divison-a Deoria aṭangin a ṭan a, Yatra a neih chhung hian km 3,438 zinin, district 48 leh assembly constituency 141 a tlawh hman a ni. Loneitute nen inkhawmhona ṭum 26 leh roadshow vawi 26 a nei a, loneituten loan ba ngaihdam tura an dilna lehkha nuai 75 a lakhawm bawk. Dilna lehkha hi UP-ah hian lakhawm chhunzawm zel a tum a, October 31 hmain vaibelchhe hnih lakhawm hman an tum tih a sawi.

Yatra kharna hi Delhi-a Parliament Street-ah nimin khan a nei a, a khar hma hian Mahatma Gandhi, PM hlui Lal Bahadur Shastri leh Indian National Lok Da dintu leh loneitu pawl hruaitu hlui Chaudhary Devi Lal-te thlanah zahna a hlan a ni. Congress party chuan Parliament thlasik ṭhutkhawmah loneitute harsatna tawh hrang hrang leh an leiba ngaihdam sak tura an ngen chungchang hi sawichhuah a tum.

Congress thupuangtu RPN Singh chuan, "Sorkar laipui chu loneitute leiba ngaihdam sak turin kan nawr dawn a, eletric bill pawh a zahvea tihniam sak turin kan ngen dawn a ni. Prime Minister Narendra Mod hian industrialist-te loan ba a ngaihdam sak thei chuan, eng vangin ngen loneitute ba chu a ngaihdam theih loh bik ang?", a ti.