US Tax official anga inchhal call centre worker 70 man

Mumbai Police-te chuan US tax official anga inchhal a, America mite bum ṭhin, call centre-a thawk mi 70-te an man.

Mumbai-a call cente pakua an dapnaah, police-te hian hnathawktu mi 772 te an hreng a ni. An zinga 70 chu man zui niin, midang 630 chu thu zawhfiah leh tura chhuah lailawk a ni a, mi 72-te erawh chu thu delhkilh awm loa chhuah an ni.

Deputy Commissioner of Police Parag Manere chuan an thil tum ber chu sum hmuh a ni tih sawiin, "Dan loin thil an ti a, US Internal Revenue Service official angin an inchhal a ni" a ti. Hnathawktu mante hi khawi company-ah thawk nge tih puanzar a ni lo a, thil tidik lote chhuinaah US nen an thawkdun em ti pawh police-te hian an sawichiang duh lo a ni.

Manere chuan call centre worker-te hian America mite chu chhiah pekna atan hian prepaid cash card lei turin an ti a, an lei duh loh chuan manah te an vau niin a sawi.